Piäluštemtooimâ pargoh láá lahâaasâtliih já toi olášutmist tiäduttuvvoo jotteelvuotâ, pehtilvuotâ já oovtâstpargo.
- Sisâministeriö joođeet já kocá piäluštemtooimâ.
- Lope- já kocceemvirgáduvah tuárjuh já koceh kuávlulii tooimâ.
- Pyereestvaijeemkuávluh uárnejeh piäluštemtooimâ palvâlusâid.
- Sopâmušpuálukodeh já piäluštemsyergi ornijduvah tievâsmitteh vuáháduv
Sisâministeriö joođeet já kocá piäluštemtooimâ
Sisâministeriö västid piäluštemtooimâ väldikodálii stivriimist, oovdedmist já lahâaasâtmist. Ministeriö piäluštemuásádâh:
- Joođeet, stivree já kocá piäluštemtooimâ palvâlusâi finnimvuođâ já tääsi.
- Valmâštâl piäluštemtooimân kyeskee lahâasâttem.
- Soovât oohtân jieškote-uv ministeriöi já toimâsuorgij toimâm piäluštemtooimâst.
- Meerrid aalmugijkoskâsii iššeedmist piäluštemtooimâ tááhust.
Piäluštemuásáduv stivree piäluštemollâhovdâ, já tot tuáimá staatârääđi uássin. Ulmen lii torvolâš já kriisijd killájeijee Suomâ.
Lope- já kocceemvirgáduvah tuárjuh já koceh kuávlulijd tooimâid
Lope- já kocceemvirgáduvah tuáimih sisâministeriö toorjân já koceh piäluštemtooimâ jieijâs kuávluin. Toi pargoid kuleh:
- Kocceeđ piäluštemtooimâ palvâlusâi finnimvuođâ já tääsi.
- Tuárjuđ kuávlulii rahttâttâm já oovtâst toimâm.
- Árvuštâllâđ piäluštemtooimâ palvâlustääsi já rähtiđ äššitobdeeárvuštâlmijd.
- Kocceeđ eromâš vaarâ tovâtteijee čuosâttuvâi piäluštemvuáváámijd já hárjuttâsâid.
Lope- já kocceemvirgáduvah visásmitteh, et piäluštemlájádâsah nuávditteh piäluštemlaavâ já et palvâlusah västideh páihálijd táárbuid já uuhkijd.
Pyereestvaijeemkuávluh uárnejeh piäluštemtooimâ palvâlusâid
Piäluštemtooimâ ornimkenigâsvuotâ lii 21 pyereestvaijeemkuávlust já Helsig kaavpugist. Pyereestvaijeemkuávluh:
- Västideh piäluštemtooimâ palvâlusâi orniimist jieijâs kuávlust.
- Vuávájeh já olášutteh palvâlusâid pehtilávt já ulmemiäldásávt.
- Aneh huolâ palvâlustäsimiärádâsâin, moh vuáđuduveh kuávlulijd riskáid já tárboid.
- Paijeentuálih puálusajattâhviermi já piäluštemtooimâ valmâšvuođâ.
Pyereestvaijeemkuávluh tuáimih staatâ ruuđáin já láá jiešhaaldâtliih almosriävtáliih siärváduvah.
Sopâmušpuálukodeh já piäluštemsyergi ornijduvah tievâsmitteh vuáháduv
Sopâmušpuálukodeh láá iävtutátuliih tâi priivaat puálukodeh, moh tuáimih piäluštemlájádâssáin tohhum sopâmuš vuáđuld. Sopâmušpuálukodeh
- uásálisteh časkâdem- já piäluštempargoid
- tuáimih reservin spiehâstâhtiilijn já aalmugsuoijâlmist
- luávdih suullân 90 % Suomâ asevijđoduvâst já tipšoh masa pele larmâdâspargoin.
Piäluštemsyergi ornijduvah tuárjuh virgeomâhâštooimâ il. škovliimist, čuovvitmist já luhottesvuođâi estâlmist. Teháliih tuáimeeh láá:
- SPEK – Suomen Pelastusalan Keskusjärjestö (Suomâ piäluštemsyergi kuávdášornijdâh)
- SPPL – Suomen Palopäällystöliitto (Suomâ puálunjunošijlitto)
- SPAL – Suomen pelastusalan ammattilaiset (Suomâ piäluštemsyergi áámmátliih)
- Vapepa – Vapaaehtoinen pelastuspalvelu (Iävtutátulâš piäluštempalvâlus)
- SSPL – Suomen Sopimuspalokuntien Liitto (Suomâ sopâmušpuálukuudij litto)
Oovtâst taah tuáimeeh hämmejeh luávdee já maaŋgâpiälásii piäluštemtooimâ vuáháduv, mii tuáimá aargâst, kriisâin já spiehâstâhtiilijn.
